Nú er skólinn byrjaður hjá mér. Guðný kom frá Ísafirði fyrir viku og verður heima næstu 4 vikurnar til viðbótar. Hún kom nú bara nokkuð brött að vestan, en er búin að ná sér í kvef eina ferðina enn. Hún var svo heppin að fá hana Indu í morgunaðstoðina, heimahjúkrunina, og svo er það hún Ólafía Sigurvinsd. sem ætlar að vinna með henni á daginn. Okkur og Guðnýju líst mjög vel á þessar komur, þær standa sko fyrir sínu. 
Enn er ekki komin tímasetning á flutning til Ísafjarðar, skil ekki af hverju það þarf að dragast svona þegar búið er að gefa jákvætt svar. Guðný verður því í sama pússluverkinu hér heima og á Ísafirði fram að áramótum.

Guðný og Jón fóru suður í dag, beinþéttnimæling á morgun og eftirlit á föstudag. Spennandi að vita hvernig kreatínið verður núna, ég þori nú ekki að gera mér miklar vonir um lækkun, Guðný er með svo mikinn bjúg sem erfitt virðist vera að losna við. En... þetta kemur í ljós...

Nú fer MA að byrja. Hrefna fer norður á laugardaginn, ég ætla að skreppa norður á föstudag og vera á námsskeiði á laugardeginum á Akureyri, gisti svo hjá Grétu systur og svo heim á sunnud. Það er alltaf svo gott að koma í Árholtið til hennar Grétu.

Kveð í bili, Steinunn

Þá styttist í vesturferð. Guðný fer á morgun og verður í 2 vikur og svo 5 vikur heima áður en hún fer svo næst. Staðan hefur lítið breyst, bjúgurinn stendur í stað, hún þyngist heldur og er með alls konar verki af og til um líkamann sem veldur því að þráðurinn er mjög stuttur a.m.k. þegar fjölskyldumeðlimir eiga í hlut. 
Ég veit ekki hvað verður í boði fyrir hana hér heima þegar hún kemur aftur, eina sem er alveg klárt er að Inda verður með heimahjúkrunina á morgnana. Hún kom í smá heimsókn einn morguninn og Guðný er mjög ánægð og að sjálfsögðu við líka, Inda kallar ekki allt í ömmu sína. En vonandi verða þessa 5 vikur bara fínar, ég veit að þær sem taka að sér skipulagningu á þeim gera það eins vel og hægt er. Ég geri mér alveg grein fyrir því að þetta er ekki auðvelt, ekki um marga að ræða.  

Af öðrum í fjölskyldunni er það að frétta að Hrefna byrjar í MA 13. sept, ótrúlegt að hún sé að byrja sinn 3ja vetur þar. Hún hefur unnið í Þörungaverksmiðjunni í sumar, í netum, löndun og svo hefur hún einnig leyst af á Karlseynni. Hún hefur haft nóg að gera, svo er alltaf eitthvað í Gullsteini líka.
Hlynur er í Þörungav. og leigir íbúð hjá Begga, hér rétt fyrir neðan og hann bara vinnur og vinnur.
Alltaf nóg að gera hjá Björk og Torfa, hann í Þv. og Gullsteini og Björk í heimilsihjálp í sumar, fer svo að vinna í Barmahlíð í vetur.
Steinunn og Sigurjón fara í 3. og 1. bekk, þau verða í samkennslu. Ég er svo heppin að fá að kenna þeim í vetur en við Ásta verðum saman með 1. 2. og 3. bekk. Sigurjón hefur talið niður dagana eftir að skólinn byrji.
Jón vinnur bara og vinnur eins og ávalt, en ég geri lítið sem ekki neitt, æ, kannski ekki alveg. Ég náði mér í kvef og vesældóm eftir fyrstu formlegu vinnuvikuna í skólanum en ég ætla að vera orðin hress á morgun, annað er ekki í boði, fyrsti skóladagurinn, þá getur maður ekki verið veikur.
Um næstu helgi eru Reykhóladagar haldnir hér í sveit, Spurningakeppni, grill, allir skreyta þorpið og sveitna sína, markaður, nokkrir bjóða í súpu í heimahúsum á laugardeginum - það verður bara gaman, matur, skemmtun og svo ball. Björk stýrir þessu núna með aðsoð félagasamtaka í sveitinni.  Þetta verður örugglega mjög gaman.

Nú þarf ég að fara að hafa Guðnýju til fyrir vesturferð, taka til lyf, pakka og muna að gleyma engu.

Bless í bili.

Guðný var í eftirliti í gær. Kreatínið hefur lækkað er komið í 172, mun betra en ég þorði að vona, þarf samt að fara neðar svo henni líði betur. Vonandi er þetta allt á réttri leið. Hún er samt enn með talsvert mikinn bjúg um allt og þráðurinn er stuttur. Næstu tvær vikur verður hún hér heima, síðan tvær á Ísafirði.  Allt bendir til að búið sé að leysa heimahjúkrunina meðan hún er heima en trúlega ætlar hún Inda að taka hana að sér og erum við mjög kát með það. Hrefna Karls ætlar að vinna með Guðnýju fram að næstu ferð vestur. Þá á eftir að finna lausn á þeim hluta þegar Guðný kemur aftur frá Ísafirði, það leysist einhvern veginn.
Nú þarf ég að fara að komast í skólagírinn en það er bara gaman.

Góðan daginn.
Ég fæ bara góðar fréttir af Guðnýju frá Ísafirði. Alltaf jafn gaman og gott að vera þar. Hún er búin að þræða útsölurnar og kaupa sér föt, fara í klippingu og strípur, sagði að hárgreiðslukonan hefði verið harðhent. Það getur vel verið en hún er líka orðin aumari í hársverðinum, fylgir hækkuðu kreatíni.
Við höfum fengið jákvæðar fréttir varðandi búsetu á Ísafirði og ég ælta að leyfa mér að birta það hér í von um að þetta gangi ekki til baka. En þannig er, að til stendur að flytja skammtímavistunina í einbýli og þá yrði núverandi húsnæði skammtímav. notað sem þjónustuíbúðir fyrir 3 einstaklinga sem eru í brýnni þörf fyrir búsetu og er Guðný ein af þeim. Í húsinu eru fyrir tvær íbúðir með 4 íbúum og því er þetta talið geta hentað vel. Okkur líst alveg rosalega vel á þetta og Guðný er mjög spennt fyrir þessu. Þarna er hún farin að þekkja sig svo vel og stutt í allt sem hún þarf á að halda. Þetta er mjög góð lausn. Vonandi verður af þessu í ca. nóv. eða alla vega fyrir áramót.
Næstu tvo mánuði verður hún að mestu heima og ég hlakka ekki til þess tímabils fyrir hennar hönd. Allt þetta pússluspil fer illa með hana og okkur og hún hrapar alltaf niður þegar hún er svona lengi heima.En vonandi horfir síðan allt til betri vegar.
Ég er búin að sitja á mér að upplýsa um þetta en nú ætla ég að vona að þetta sé komið það áleiðis að óhætt sé að fara að tala um þetta sem raunhæft úrræði.

Bless í bili. Steinunn

 Guðný er komin til Ísafjarðar. Við fórum vestur í gær. Enn og aftur sýndi það sig hvað það er orðið brýnt að Guðný geti flutt vestur.  Guðný heima og Guðný á Ísafirði er ekki sama manneskjan. Undanfarið hefur allt verið í mínus, nema rétt á meðan Elísabet og Hrefna hafa verið með henni. 
Ferðin vestur gekk alveg þokkalega en alltaf kvartaði daman mín ef bíllinn hossaðist eitthvað, fann svo til í kringum hnappinn en þar hefur verið ígerð í all nokkurn tíma. Þegar vestur var komið birtist ný manneskja. Hún spratt út úr bílnum, hljóp inn og bara ekki sú sem var í bíl með mér í 3 tíma. Fór út á pall og heilsaði, drakk úti og lék á alls oddi. Ég þurfti að fara í hraðbanka og taka út pening fyrir hana og svo mátti ég bara fara.  Fannst ég bara stoppa full lengi en ég þurfti að fara í gegnum lyfin og upplýsa um niðurstöður úr síðasta eftirliti, en kreatínið er komið í 208, ekki gott.
Núna  verður hún í tvær vikur fyrir vestan en síðan verður hún heima að mestu í ágúst og september. Það er ekki spennandi tilhugsun fyrir hana. Hér er búið að fullnýta allt og ekkert nema pússl og reddingar sem bíða hennar. Þetta er ekki boðlegt. Þessi staða kemur henni auðveldlega í rúmið, það hafa síðustu vikur sýnt. Ég gæfi mikið fyrir að þessi staða myndi breytast skjótt.

Hætt að nöldra í bili, komin tími til að halla sér eftir sólríkan dag.
Kv. Steinunn

Enn þá ætla ég að halda áfram að dásama stelpurnar sem koma hér á daginn. Þær eru ómetanlegar fyrir Guðnýju og þar með okkur hin. Ég er ekki ánægð með ástandið hjá dömunni minni núna. Hún er enn með ígerð hjá hnappnum, var sett á sýklalyf í gær, vonandi virka þau, en þetta plagar hana talsvert. Hún var svo uppgefin eftir daginn að hún var sofnuð rétt rúmlega 8 í kvöld. Fróðlegt að vita hvernig nóttin verður en hún talar mikið um að sér líði illa alls staðar.  Ég get ekki sagt að ég sé allt of bjartsýn en auðvitað vonar maður að þetta gangi yfir. Hún fer á Ísafjörð á laugardaginn og þar hefur hún oftast náð sér dálítið á strik.  Ef ég á að vera alveg hreinskilin þá finnst mér það satt að segja helv... hart að hún skuli ekki fá nema nokkra mánuði með  sæmilega heilsu. Hún var með hressasta móti rétt yfir háveturinn. Þegar á leið fór að halla undan fæti og það er eins og henni megi aldrei líða sæmilega, þá þarf alltaf eitthvað nýtt að koma.  Hún er laus við magaverkina, alla vega í bili, en þeir hafa hrjáð hana í marga mánuði, þá er það sýking og verkir með henni og vanlíðan.
Stundum langar mig til að arga og garga en það breytir víst ekki ástandinu hjá henni. Þetta er kannski eitthvert svartsýnisraus hjá mér, það verður bara að hafa það, kannski líður mér betur á eftir.
Takk, þið sem nennið að lesa þetta.. 

Góðan og blessaðan daginn. Sól og smá vindur og tiltölulega hlýtt, sem sagt garðveður.  Núna hrýtur Guðný inni í stofu. Mér finnst hún vera allt of þreytt. Vaknar núna alltaf á nóttunni, er illt í bakinu og svo er komin smá ígerð í kringum hnappinn, eða hnappagatið eins og við köllum það, en þar sem hún er með gat á maganum og í gatinu er hnappur þá hlýtur þetta að vera hnappagat. Vikan er búin að vera svona, hún þarf oftast að sofna á daginn allt upp í 2 - 3 tíma. Gamli pirringurinn er farinn að gera vart við sig og ég veit ekki hvernig ástandið hérna á heimilinu væri ef hún fengi ekki heimahjúkrun á morgnana því í morgunverkunum er ég ekki sú vinsælasta.
Stelpurnar, þær Elísabet Valda og Hrefna Karls, sem koma til hennar, eru algjörar perlur, þær eru svo flottar í þessu og Guðný er mjög hamingjusöm með þeim. Hvað það varðar er ekki hægt að hugsa sér það betra. 

Kv. Steinunn

Guðný var í eftirliti í gær og ég hefði nú alveg þegið betri niðurstöður.  Kreatínið heldur áfram að hækka, er komið í 208 og fátt virðist vera til ráða. Smá möguleiki að hækkað kalsíum hafi einhver áhrif en það er allt of hátt og því losnar hún við 2 töflur á dag næstu tvær vikur og síðan eina eftir það. Það kemur svo í ljós í næsta eftirliti sem er 4.ágúst hvort það hefur eitthvað haft með þetta að gera. Hún er orkulítil, alltaf þreytt, og gamli pirringurinn er farinn að gera vart við sig af og til. Satt að segja finnst mér þetta fjandi fúlt. Við ætlum samt að stefna að því að hún geti flutt til Ísafjarðar einhvern tíman í ekki allt of fjarlægri framtíð. Þegar að því kemur að hún þarf að fara í blóðskilun og fara aftur á lista þá tökum við bara á því þegar þar að kemur. Það er frekar óþægilegt að skipuleggja eitthvað sem við vitum ekki hvað við erum að skipuleggja, - þetta var mjög gáfulega mælt -

Guðný fór í gróðurhúsið í dag að tína tómata með Hrefnu Karls. Þær eru flottar saman, núna er að bara dvd gláp og hugguleg heit. Á morgun er það svo Hólakaup hjá Óafíu og Eyva. Guðný er mjög kát með þá vinnu líka.

Nú er best að fara að rífa sig upp úr þessum doða, en einhvern veginn fer ég öll í baklás við svona fréttir, en það þýðir ekkert að vorkenna sér. Lífið er dans á rósum, það hef ég alltaf sagt, rósin er falleg og ilmar vel en hún er líka með þyrnana sem maður stingur sig á, því finnst mér það alveg passa.
Núna er það annað hvort tiltekt eða leika mér í saumaherberginu mínu, hvort ætti ég að gera......   Búin að ákveða mig, það er saumaherbergið sem kallar.

Bless í bili. Steinunn

Við Hrefna náðum í Guðnýju til Ísafjarðar í gær. Daman er ótrúlega brött og kát. Átti mjög góða daga á Ísafirði. Verður núna heima í 3 vikur og fer þá aftur og verður í 2 vikur. Alltaf sama pússlið. Næstu 3 vikur hér heima líta vel út,  fer í vinnu upp í búð og einnig í gróðurhúsið til Madda. Inga Sæm verður með henni í þessu til 1.júlí en þá ætlar hún Hrefna Karls. að vera með henni, Guðnýju líst mjög vel á það. Elísabet Valda. verður með heimahjúkrunina næstu 3 vikur og það er alveg frábært, hún er ekkert smá flott í þessu og Guðný er mjög sátt við hana. Það er sko ekki hægt að kvarta yfir þessu skipulagi.

Guðný virðist vera að jafna sig eftir höfnunina, reyndar vilja doksarnir nú meina að ekki hafi verið um svo mikla höfnun að ræða heldur bólgur og nú er talað um langvarandi breytingar eða eitthvað í þá áttina. Það er svo sem heldur ekki það besta, því mér skylst að þær séu ekki afturkræfar, sem þá hefur áhrif á endingartíma nýrans.
Þegar þetta kom upp þá fórum við náttúrlega að velta því fyrir okkur hvað við værum að gera, þyrftum við núna að fara að huga að breyttri búsetu, flytja suður, sem er kannski ekki svo einfalt. En þegar við vorum komin yfir mesta áfallið vegna þessara nýjustu frétta ákváðum við að reyna bara að halda okkar striki og stefna áfram að því að Guðný flytji vestur. Á Ísafirði er alveg frábært umhverfi fyrir hana, henni líður mjög vel þar, hefur nóg fyrir stafni og svo líka það að hún kemur ekki til með að búa endalaust heima hjá okkur, það er bara þannig. Hún flytur að heiman eins og annað ungt fólk.

Hrefna er farin að vinna í Þörungaverksmiðjunni, í netum og svo leysir hún af á Karlseynni, fór fyrsta túrinn í morgun, átti að vera mætt fyrir kl 6 í morgun. Þetta er bara gaman.
Meira síðar, kv. Steinunn

Gleðilegan 17,júní öll.
Hún Guðný er alveg ótrúleg. Í gær fór hún í búðaráp og keypti sér sumarjakka og hún gekk alein yfir í Hvestu. Ég vissi að þegar hún var síðast fyrir vestan var verið að ráðgera með henni að hún myndi prófa það fara ein, en ég átti ekki von á að það gæti gerst núna. Svona er Guðný, er alltaf að koma manni á óvart. Tekur veikindaniðursveiflur og svo er hún þessi svaka nagli, ekkert mál að fara í blóðprufur í gær og annað eftir því. Þetta er alveg dásamlegt.

Hérna er algjör blíða, logn og sól, og ég ætla að dunda mér í garðinum í dag, kannski að kíkja smá inn í Bjarkalund í kaffi.  Já og eitt enn, Henni frændi, sonur Tomma bróður, varð pabbi í gær, til hamingju með það.

Sólin bíður, kv. Steinunn

Guðný er alsæl á Ísafirði, ég átti reyndar ekki von á neinu öðru. Mér heyrist á öllu að henni sé farið að líða betur, svefninn er betri. Hú fór í Hvestu í gær, og var heilmikið úti og gekk mikið. Var alveg búin þegar hún kom til baka í Sindragötuna, en það var allt í lagi. Hún fékk fótanudd og slakandi tónlist og fékk sér vænan bjútíblund. Var í dekurbaði þegar ég hringdi í gærkvöldi. Hvað er hægt að hafa það betra.
Nú er bara að vona að hún komist í búsetu á Ísafirði fyrir veturinn. Hún þarf svo virkilega á því að halda. Hún á bara eftir að kvoðna niður hér heima, það má ekki gerast.
Bless í bili. Steinunn

Guðný er komin til Ísafjarðar.
Við fórum vestur í gær og fær hún að vera til 27.júní.
Hún þarf líklega ekki að fá insúlín v. sykursýkinnar heldur fær hún tvær töflur á morgnana þ.e.a.s. ef blóðsykurinn fer ekki niður fyrir 4, þarf að mæla hann á hverjum morgni, fastandi.  Það er mun þægilegra heldur enn þessar sprautur, því hvað eru tvær töflur í viðbót við allar hinar.
Hún var mjög kát að komast vestur, en var vissulega orðin þreytt eftir ferðina.  Það hefur orðið ansi mikill afturkippur hjá henni við þesssa höfnun. Úthaldið er lítið og orkan lítil. Svo er hún líka orðin svo hrædd, sem er ekkert skrítið.
Ég brunaði bara heim aftur í gær, fannst einhvern vegin best að koma mér heim. Mér finnst þessir frídagar mínir líka svo mikilvægir. Garðurinn minn er allur kominn í órækt og nóg að gera þar næstu daga. Um helgina förum við gamla settið svo í sumarbústað, ætlum að slaka smá á. Hrefna getur þá notið þess að vera án okkar.

Guðný á að fara í blóðprufu fyrir vestan á miðvikudaginn, ég læt vita hvernig þær koma út.
Kv. Steinunn

Þá erum við komin heim eftir heldur viðburðaríka daga í bænum.
Guðný er með væga höfnun og var strax á laugardagsmorgun byrjað að meðhöndla hana með sterum. Venjulega tekur hún alltaf eina 5 mg töflu af sterum á dag en núna eru það 40 mg sem hún þarf að taka  eða 8 töflur. Þeim verður síðan fækkað hægt og bítandi eða um eina á viku.  Þessir bévítans sterar hafa ansi mikla aukaverkanir, hún blæs út, fær mikinn handaskjálfta, verður örari og pirraðri. Verst af öllu er þó að blóðsykurinn fer allur í klessu, þurfum aftur að fara að mæla hann. Vorum búin að tala um það við hana að við myndum byrja í fyrramálið að mæla blóðsykurinn, hún var samt alveg til í að prófa mælingu í kvöld og var hann kominn í 12.6 sem er allt of hátt. Samt var ekki fræðilegur möguleiki að fá að sprauta hana í kvöld, því þetta átti ekki að byrja fyrr en á morgun. Þá er bara að vona að hún taki því á morgun ef staðan verður svipuð.  Einhvern veginn fannst mér á lækninum hennar að þetta myndi ekki gerast svona fljótt, alla vega sáu þeir ekki ástæðu til að mæla hana á spítalanum á laugardaginn. Þetta var svona til að kóróna ástandið að sykurinn færi í rúst. Nógu hrædd er hún búin að vera þessa daga. Mest óttaðist hún að þurfa að fara aftur í kviðskilun, en hún sagði mér ekki frá þeim áhyggjum fyrr en í gær. Þá áttaði ég mig á því að hún vissi ekki að sá möguleiki væri ekki inni í myndinni vegna þess hvernig lífhimnan er farin eftir þann tíma sem hún var í kviðskilun. Það var ansi erfitt að tala um það að blessað nýrað væri ekki eilíft og hún myndi þurfa að fá aftur gjafanýra einhvern tíman seinna, en vissulega hefur þessi höfnun núna áhrif á starfsemi og endingu nýrans.
Undanfarið höfum við verið að reyna að hugsa um nánustu framtíð Guðnýjar, búsetu og annað, en eftir þessa síðustu daga veit ég bara ekki hvernig við eigum að hugsa framhaldið.
Þar sem Guðný er orðin fullorðin var hún núna í fyrsta sinn á fullorðinsdeild á Lsh. Mikið var það lítið spennandi, eignlega bara ömurlegt. Hún á jafn mikið heima þar og hún ætti heima í Dvalarheimilinu Barmahlíð. Þarna var bara mjög fullorðið veikt fólk og umhverfið eftir því. Starfsfólkið var frábært eins og annars staðar á spítalanum, það er ekki við það að sakast. Ég var hjá henni um nóttina og ég gat valið á milli dýnu eða lazyboy stóls, ég valdi stólinn því ég vissi að hún myndi þurfa mikið á mér að halda um nóttina, en svefninn var ansi skrykkjóttur og hlykkjóttur, þ.e.a.s. stóllinn var ansi hlykkjóttur og lúinn. Hún saknar barnadeildarinnar mjög.
Nú er gáfulegast hjá mér að fara að sofa. Góða nótt.

Jæja, hér eru helstu fréttir af Guðnýjunni minni.
Eins og ég hef skrifað áður þá hafa magaverkir, stingir verið að plaga hana í all langan tíma. Núna hefur þetta x"#XXX""#!!!! arg arg og garg... kreatín hækkað og haldið áfram að hækka og það þýðir bara eitt.  Nýrað er ekki eins og það á að vera. Krea er komið í 186, hefur lengst af verið 120 - 130.  Hún fór í sýnatöku af nýranu í gær, niðurstöður úr því koma á mánudag. Smá vonir voru bundnar við að um einhvern vírus væri að ræða en það var ekki svo gott. Læknirinn sem talaði við okkur í gær og er með G um helgina sagði að þessi höfnun sem kom strax eftir aðgerðina úti í Danmörku og svo aftur hér heima rétt eftir að við komum heim frá Danmörku ( bara tvö ár síðan) sé dálítið ágeng, eins og hann orðaði það og hann er dálítið hræddur um að eitthvað líkt sé í gangi núna. Alla vega verður hún meðhöndluð um helgina eins og um það væri að ræða. Fær fullt af sterum, vonandi verða aukaverkanirnar af þeim á þann veg að hún fer pínu upp en ekki niður í þunglyndi, hún má ekki við því, en hún er ansi, hrædd, kvíðin og stressuð, því hún veit alveg að nýrað er ekki eins og það á að vera núna. En á mánudaginn ætti eitthvað að skýrast.
En að öllu óbreyttu verðum við í Melgerðinu um helgina og vonandi gengur það upp.

Skrifa meira þegar eitthvað verður að frétta.

Öskufallskveðjur af höfuðborgarsvæðinu, þetta er samt ekkert miðað við það sem er á suðurlandinu, okkur er sko ekki vorkunn.

Kv. Steinunn

Góðan og blessaðan daginn.
Alltaf sama blíðan hérna.
Guðný mætti vera hressari. Fórum suður fyrir viku og hún gisti hjá Hrefnu frænku og Stebba í tvær nætur, ég var í skólaheimsóknum með kennurunum, gaman gaman. G fór í blóðprufu og krea hafði hækkað um 10 eða komið í 166. Fátt um skýringar. Þrátt fyrir aukin þvagræislyf hefur hún ekkert lést ( er þetta örugglega rétt skrifað hjá mér )  og bjúgurinn er sá sami. Hún talar núna meira um almenna vanlíðan, að sér líði alls staðar illa. Ég veit ekki hvort eitthvað er að fara á verri veg en óneitanlega fáum við hnút í magann, það er eins og henni megi aldrei líða þokkalega vel nema í skamman tíma í einu. Blóðþrýstingur og púls hafa líka verið í hærri kantinum en nú er verið að reyna að laga það með lyfjum. Vonandi tekst það.
Bæði í gær og í dag er hún ansi drusluleg, maginn í klessu og því ekki grundvöllur að fara mikið út því hún þarf að vera nálægt wc. Við þessar aðstæður verður manni ansi lítið úr verki. Ég vaknaði nú frekar seint í morgun og ætlaði svo út í garða að slá en einhvern veginn er ekki grundvöllur fyrir því, það er líka komin upp hræðsla, hún segist vera hrædd og það er ekkert skrýtið.
Ég var inni í Bjarkalundi í gær frá 9 - 22, er í kjörstjórn, því virðulega embætti. Þetta er bara gaman, maður hittir svo marga úr sveitinni og það var létt yfir öllum. Mér líst vel á nýju sveitarstjórnina og óska henni góðs gengis, en ég öfunda ekki þá sem eru í þessu, þetta er oft ákaflega vanþakkað starf.
Nú þarf ég að hjálpa G, kveð því, Steinunn